صندوق الفُرجة

شوف تفرج آه يا سلام

شوف أحوالك بالتّمام

شوف قدّامك عجايب

شوف قدّامك غرايب

يا حبيبي لو بتشوف

شوف أحوالك عالمكشوف

شوف جبال وشوف وديان

سوريا وجبل لبنان

كانت قطعة من الجنان

أمّا اليوم يا حسرة

الأرض حفرة نفرة

ما فيها عشبة خضرة

يا حفيظ ويا أمين

من غدرات الزّمان

الفلّاح شلح التّبّان

وعاف السّكة والفدّان

وراح تعيّن عند فلان

مغرور بحبّ الألقاب

وما حاسب للغزل حساب

كان سلطان وصار بوّاب

يا حفيظ ويا أمين...

من غدرات الزّمان...

صار مأمور ماله صوت

عايش من قلّة الموت

شحّاد لابس ردنجوت

عرق جبينك بيفيدك

وعزّة نفسك بتريدك

وأشرف من مَدّة إيدك...

يا حفيظ ويا أمين...

بتركض بتركض عالتّسعة

بتشدّ وبتكدّ وبتسعى

بينوبك واحد من تسعة

العصفور بيتسلّى

يسرح بيرمح بيتفلّى

والصّباد بيتقلّى

يا حفيظ ويا أمين...

بعشرة فول وبخمسة زيت

كنت تعشّي أهل البيت

أمّا هالأيام يا ريت

ليرة واتنين ما بيكفيك

يا محْلا يوم المتليك

والسّحتوت ونحاسه ديك

يا حفيظ ويا أمين...

شوف النّاس عمّا تبكي

واللي ما بيبكي بيشكي

واللي ما بيشكي بيحكي

مرضك منّك لا تخفيه

وان كنّك شاطر داويه

دود الخلّ منه وفيه

يا حفيظ ويا أمين...

كلّها يوم يومين بتهون

وبيطلع ورق اللّيمون

وبسقيك بالوعد يا كمّون

بين ما تطلع هالاوراق

ويجي التّرياق من العراق

بيكون العليل فارق

يا حفيظ ويا أمين...

شوف ملوك بني عثمان

كانوا ملوك على الزّمان

وناموا عامخدّة أمان

علّوا ناس وطّوا ناس

وطرفهم عمره ما انداس

كانوا ملوك وصاروا ناس

يا حفيظ ويا أمين...

والدّنيا صندوق فرجة

لا تغرّك منها البهجة

من يوم ما خلقت عوجة

لا تبكي عليها وتنوح

ما بتحرز ما فيها روح

تفرج في عينيك وروح

(١٩٢٤)